Хенри Кисинџер, дипломатот и најмоќниот државен секретар во повоената историја на САД, почина во својот дом во Кент, Конектикат. Имаше 100 години.  Веста за неговата смрт ја објави неговата консултантска фирма, пишува Њујорк Тајмс.

Малкумина  дипломати биле оспорувани  и обожавани во ист степен како Хенри Кисинџер, пишува Тајмс.

Се сметаше за прославен како ултра-реалист кој радикално ја промени американската дипломатија доколку тоа го бараат интересите на земјата, но беше критикуван и за напуштање на американските вредности, особено во областа на човековите права.

Тој стапи  во историската сцена во критичен момент во американската историја и дипломатија, како втор највлијателен човек во администрацијата на претседателот Ричард Никсон.

Кисинџер стана дел од неговиот тим во јануари 1969 година како советник за национална безбедност и ја задржа таа позиција откако беше назначен за државен секретар (министер за надворешни работи) во 1973 година. Кога Никсон поднесе оставка, Кисинџер остана државен секретар и во администрацијата на претседателот Џералд Форд.

Најголем успех во неговата кариера се смета  одмрзнувањето на односите со Кина.

Тој беше единствениот американски дипломат кој се сретна со сите кинески лидери, од Мао Це Тунг до Кси Џинпинг.

Кисинџер последен пат се сретна со Си Џинпинг во јули оваа година, на 100-годишна возраст, а кинеските власти му приредија кралско добредојде, иако односите на Пекинг со САД во последно време се  прилично заладени, пишува Њујорк Тајмс.