По битката со ракот почина актерката Пети Јасутаке. Таа имаше 70 години. Нејзиниот долгогодишен менаџер и пријател Кајл Фриц ја потврди веста за „Дедлајн“.

„Уживавме да работиме заедно. Ќе ми недостига нејзиниот талент и истрајност, но најмногу нејзиното пријателство“, изјавил Кајл.

Пети на многумина им е најпозната по улогата на медицинската сестра Алиса Огава во франшизата „Ѕвездени патеки“. Таа се појави во четвртата сезона на „Ѕвездени патеки: Следна генерација“ во 1990 година, а подоцна ја повтори улогата во „Ѕвездени патеки: „Генерации“ (1994) и „Ѕвездени патеки: Првиот контакт“ (1996). Таа, исто така, го позајми својот глас за видеоиграта од 2001 година „Ѕвездени патеки: Армада Два“.

Нејзината последна улога беше во серијата „Кавга“ на Нетфликс, во која го толкуваше ликот на Фуми Накаи.

Јасутаке е родена во Лос Анџелес, каде што дипломирала глума. Кариерата ја започнала во театарот „Играчи на Исток Запад“, каде што настапувала во повеќе од 10 претстави.