Актерката Кирсти Eли почина на 71-годишна возраст, по тешка и приватна битка со ракот, пишува „Ти-ем-зи“.

Тажната вест ја споделија нејзините деца Вилијам Тру и Лили Прајс со официјално соопштение на социјалната мрежа Твитер.

„Со тага ве известуваме дека нашата неверојатна и сакана мајка почина по битката со ракот, кој неодамна беше откриен.

Таа беше опкружена со нејзиното најблиско семејство и се бореше со неверојатна сила, оставајќи нѐ сигурни во нејзината бескрајна радост за животот и за сите авантури кои претстојат. Колку и да беше легендарна на екранот, таа беше уште поневеројатна мајка и баба.

Ние сме благодарни на неверојатниот тим лекари и медицински сестри во Центарот за рак во Мофит за нивната грижа.

Нејзината страст за животот, за нејзините деца и внуци и за нејзините многубројни животни, а да не ја спомнуваме нејзината вечна радост за создавањето нови дела, нѐ инспирираат да го живееме животот по потполност, исто како што живееше и таа“, пишуваат нејзините деца.

pic.twitter.com/g4nAItrR5x

— Kirstie Alley (@kirstiealley) December 6, 2022

Сѐ уште не се знае точниот тип рак со кој се соочувала актерката.

Кирсти Eли стана светски позната со улогата Ребека во комичната серија „Cheers“, која ѝ донесе и престижни телевизиски награди како Еми и Златен глобус.

Исто така, нејзините обожаватели ќе ја паметат по улогите во филмовите „Look Who’s Talking“, „Star Trek II: The Wrath of Khan“, „It Takes Two“ и многу други.