Три ретки и скапи коњи, по потекло од Монголија, за само 24 часа угинаа во скопската Зоолошка градина. Обдукцијата ќе треба да покаже која е причината за смртта на едни од најсилните животни кои биле здрави и тешко скротливи.
Угинувањето на коњите го пријавиле вработените во Зоолошка, викнале и полиција бидејќи се сомневале дека коњите се намерно отруени.

– На 29.07.2023 во 15.40 часот вработен во Зоолошката градина во Скопје пријави во СВР Скопје дека угинале два коња, за кои се сомневал дека биле отруени. Се работи на расчистување на случајот. Вчера (30.07.2023) околу 12,10 часот, вработен во Зоолошка градина Скопје пријави во СВР Скопје дека угинал и уште еден коњ – соопштија од Министерството за внатрешни работи.

Станува збор за диви коњи , кои се многу редки во светот и познато е дека бројноста во дивината им е проценета на околу 300 единки, а пак во соолошките градини ширум светот според податоци од почетокот на 1990 година, живееле само околу 1.500 единки. Коњите во Скопје ЗОО биле мажјаци, кои пред 12 години се донесени како донација од приватна компанија од Австрија.

Ова не е прв трагичен случај со животни во Зоолошката градина во Скопје оваа година, во мај од салмонела угина жирафата Каспер.

Инаку, пред еден месец скопската Зоолошка градина го изгуби кандидатскиот статус за членка на Европската асоцијација на зоолошки градини и аквариуми (ЕАЗА), поради неисполнување на низа обврски зададени од ЕАЗА. Конечната одлука била донесена по скандалозното крвничко колење на десетина коњи и мазги кои преку ноќ беа донесени во скопската зоолошка.