Средбата на американскиот специјален претставник Стив Виткоф со рускиот претседател Владимир Путин во Москва денес помина добро, но Вашингтон сепак планира да воведе санкции врз Москва во петок, објави денес Белата куќа.

„Русите сакаат да го продолжат разговорот со Соединетите Американски Држави. Очекуваме новите санкции да бидат воведени во петок“, изјави функционер на Белата куќа, според Ројтерс.
Претходно, американскиот државен секретар Марко Рубио објави дека до крајот на денот ќе ја објави одлуката за воведување нови санкции врз Русија.

Рубио истакна дека разговарал со американскиот специјален претставник Стив Виткоф по неговата посета на Москва.

Порано денес, Виткоф се сретна со рускиот претседател Владимир Путин во Москва, а нивниот разговор се одржа во „пријателска атмосфера“ и со присуство на обезбедување, и траеше околу три часа.
Портпаролката на Стејт департментот, Теми Брус, претходно потврди дека Виткоф ќе ја посети Русија, но не коментираше конкретни детали од посетата.

Ова е петта посета на Виткоф на Русија од почетокот на годината.

Последните две посети беа на 11 и 25 април, кога се сретна со рускиот претседател Владимир Путин.