Компанијата „Бамби“ соопшти дека започнала со производство на бисквити „Плазма“ со намален капацитет во фабриката во Пожаревац, по пожарот што во јуни се случи во таа фабрика. Продолжувањето на производството, како што наведуваат во соопштението, ќе се одвива на единствената од трите производни линии, која не е оштетена од пожарот, објави Данас. По првата фаза, долгорочниот план вклучува пуштање во употреба на преостанатите производни линии, како и продолжување на инвестициите во изградба и проширување на капацитетите на фабриката, соопшти компанијата. Генералниот директор на компанијата „Бамби“, Драган Стајковиќ изјави дека линијата на која го произведуваат тој бисквит може да произведе третина од сегашниот капацитет, а враќањето на „Плазма“ во продавниците може да се очекува во наредните недели.