Бидете поддршка за македонската репрезентација во СЦ „Јане Сандански“. Влезниците по цена од 100. денари за натпреварувачки ден. Македонската А футсал репрезентација вечерва од 20:00 часот против Словенија во СЦ „Јане Сандански“ ги започнува натпреварите од втората главна рунда од квалификациите за пласман на СП 2020. година.

Нашата селекција е во група со Словенија, Косово и Украина. Топ фаворит е украинската репрезентација, а целта за Македонија е второто место во групата кое носи пласман во главната квалификациска фаза за пласман на футсал Мундијалот идната година.

Влезница за натпреварувачки ден од турнирот кој го организира Фудбалската федерација на Македонија изнесува 100. денари, а може да се купи на билетарата веднаш до малата сала во СЦ „Јане Сандански“.

Натпреварите се играат во главната сала во СЦ „Јане Сандански“ во населбата Аеродром во Скопје. Капитенот на македонската футсал репрезентација, Зоран Левески вели дека против Словенија треба да бидеме доволно трпеливи и да ја чекаме нашата шанса.

– Свесни сме каков натпревар не очекува вечерва против Словенија. Овие неколку денови од подготовките работевме напорно и ќе се обидеме силно да се спротивставиме на Словенија и покрај проблемите со повреди на одредени наши играчи со кои се соочуваме. Треба од почеток да бидеме трпеливи и да ја чекаме нашата прилика, но и доволно агресивни, посебно во одбрана. Верувам дека имаме шанса против Словенија, од нас може да очекувате труд и големо залагање. Атмосферата во репрезентацијата е на високо ниво, одлично се познаваме во тимот, заедно сме неколку години и се надевам дека со правилен пристап ќе одиграме добар натпревар – вели играчот на македонската футсал репрезентација, Зоран Левески.

Нека продолжат успешните резултати на нашите најдобри спортски репрезентации кога се во прашање меѓународните дуели против Словенија.

Да потсетиме, одбојкарите на Европското првенство во арената „Стожице“, Љубљана на 17 септември го совладаа домаќинот Словенија (сега европски вицешампион) со 3:1 по сетови.

А на Националната арена „Тодор Проески“ – Скопје нашите најдобри фудбалери на 10 октомври со резултат 2:1 славеа голема победа против репрезентацијата на Словенија.

Па така, и денешниот датум 24 октомври нека биде среќен на спортски план, футсалците нека ја израдуваат македонската јавност со триумф над Словенците што би бил важен чекор кон остварување на мундијалскиот сон.