Досегашниот директор на Казнено-поправната установа „Идризово“, Шпенд Тахири, е разрешен од должноста на денешната владина седница, а на неговото место како в.д. директор е именуван полицискиот генерал-мајор Зоран Јовановски, соопштија од Владата.

Премиерот Димитар Ковачевски, говорејќи за Јовановски на денешната прес-конференција, рече дека се работи за врвен професионалец, кој има богата професионална кариера, пред се во Министерството за внатрешни работи.

Тој рече дека Јовановски во текот на својата професионална кариера поминал обуки во Полициската академија во Луизијана, организирани од Американската амбасада во земјава, како други обуки во САД, Германија, Велика Британија и Турција.

Смената на директорското место во најголемиот македонски затвор доаѓа откако се случија неколку скандали – најпрвин осуденик за убиство избега при превоз во болница, одземајќи му службен пиштол на затворски полицаец, а се откри дека во бегството имал помош од командир и чувари. Потоа во неколку наврати беа откриени големи количества дрога и оружје кај затворениците, за ситуацијата да кулминира со пронајдениот тунел преку кој дел од затворениците осудени на високи казни сакале да избегаат од „Идризово“.

Откриен тунел во „Идризово“, затвореници со високи казни се подготвувале за бегство