Израел денеска го нападна јеменскиот главен град Сана, објави телевизијата „Ал Масира“, водена од Хутите, во напад за кој очевидци велат дека цел бил Министерството за одбрана на Хутите, пренесува Ројтерс.

Израелските медиуми објавија дека Израел спроведува напади врз Јемен, но немаше непосреден коментар од израелската војска.

Жителите на Сана за Ројтерс изјавија дека нападот се случил врз скривалиште помеѓу две планини кое се користи како команден и контролен штаб. Обемот на штетата не е веднаш јасен.

Израелското воено радио соопштило дека меѓу целите на нападот биле седиштето на Хутите и воените кампови.

Израелските одбранбени сили соопштија дека ги гаѓале воените кампови на Хутите во Сана и Ал-Џаф, како и штабот на медиумите на Хутите и складиштата за гориво.

Портпаролот на Јеменските вооружени сили изјави дека голем дел од израелскиот напад бил запрен од нивната воздушна одбрана.

Израелските одбранбени сили (ИДФ) потврдија дека извршиле воздушни напади врз Јемен.

Во објава на X,  се вели дека воздухопловните сили нападнале „воени кампови“ во областите Сана и Ал-Џаф во Јемен каде што биле идентификувани оперативци на Хутите.

Додава дека цел на нападот биле и „штабот на одделот за воена пропаганда на Хутите и складиште за гориво“.

Не се наведува колку напади се извршени, но медиумите поврзани со Хутите јавуваат дека најмалку шест воздушни напади го погодиле главниот град на Јемен.

Нападите се најнови во повеќе од една година напади и контранапади меѓу Израел и милитантите Хути во Јемен, дел од прелевањето од војната во Газа.

Хутите, поврзани со Иран, нападнаа бродови во Црвеното Море, во она што го опишуваат како акти на солидарност со Палестинците во Газа.

Тие, исто така, испукаа ракети кон Израел, од кои повеќето беа пресретнати. Израел одговори со напади врз областите во Јемен контролирани од Хутите, вклучувајќи го и виталното пристаниште Ходеида.