Рибарот кој исчезна пред речиси две недели е пронајден жив како лебди на сплав за спасување на околу 110 километри од западниот брег на САД. Канадските спасувачи го пронајдоа рибарот во четвртокот, објави американската крајбрежна стража. Спасувачите раскажале како рибарот фатил и изел лосос за да преживее.

Човекот, чиј идентитет не е објавен, го напуштил Греј Харбор, Вашингтон, на 12 октомври вечерта, со чамец долг 13 метри. Официјалните лица не ги објавија имињата на спасувачите кои го пронајдоа рибарот, но Кинг-ТВ во Сиетл ги идентификуваше како Рајан Планс и неговиот вујко Џон од Сук, Британска Колумбија.

„Видов нешто што изгледаше како сплав за спасување во далечината и втрчав внатре и го вперив двогледот кон сплавот и потоа се изненадив“, рече Рајан.

„Го повлековме на бродот. Тој ме прегрна многу и беше емотивно”, продолжи Џон.

Тој додаде дека човекот му рекол дека бил сам на сплавот 13 дена и дека му кажал како ловел лосос откако останал без храна.

„Му направивме појадок. Испи три шишиња вода. Беше доста гладен, кутриот“, продолжи тој.

Официјални лица рекоа дека рибарот е во стабилна состојба и дека канадската крајбрежна стража и друга канадска агенција за спасување го вратиле на брегот.

Според Кинг-ТВ, мажот бил пренесен во болницата во Тофино на понатамошно лекување. Инаку, рибарот и уште еден човек од чамецот требало да се вратат на 15 октомври. Во средата, крајбрежната стража соопшти дека ја прекинува потрагата во очекување на развојот на нови информации.

Морнарот кој испловил со рибарот не е пронајден, а крајбрежната стража вели дека инцидентот „останува под истрага“. Не е јасно дали планираат да ја продолжат потрагата.