Потрагата по непозната планета во нашиот Сончев систем ги инспирира астрономите повеќе од еден век. Сега, една нова студија сугерира можен кандидат, кој авторите го нарекоа Планета  Y (Ипсилон).

Оваа планета не е откриена директно, туку се претпоставува врз основа на наклонот на орбитите на некои далечни објекти во Кајперовиот појас – голем прстен од ледени тела лоцирани зад орбитата на Нептун. Нешто, според истражувачите, очигледно ги нарушува овие орбити и ги навалува, пишува Си-ен-ен.

– Едно објаснување е присуството на невидлива планета, веројатно помала од Земјата, но поголема од Меркур, која орбитира во далечниот надворешен дел од Сончевиот систем – рече водечкиот автор Амир Сираџ, астрофизичар и докторски кандидат на Одделот за астрофизички науки на Универзитетот Принстон.

Сепак, тој истакна: „Оваа работа не претставува откривање на планета, но секако претставува откривање на загатка чие веројатно решение е планета.“

Сираџ и неговите коавтори ги објавија своите наоди во списанието „Месечни известувања на Кралското астрономско друштво“.

Планетата Y е најновата во серијата хипотетички планети во Сончевиот систем што научниците ги предложија во последниве години. Секоја од нив има малку различни карактеристики, но општо е прифатено дека се скриени во Кајперовиот појас – каде што се наоѓа и Плутон, поранешната деветта планета, која беше прекласифицирана како џуџеста планета во 2006 година.

Причината зошто има толку многу кандидати за „деветтата планета“ е тоа што Кајперовиот појас е темен и далечен регион на Сончевиот систем, па затоа набљудувањата се тешки и нецелосни.

Сепак, тоа наскоро би можело да се промени, бидејќи новиот телескоп на опсерваторијата Вера Ц. Рубин е на пат да започне десетгодишно набљудување на ноќното небо.

– Мислам дека во првите две до три години сè ќе стане јасно. Ако Планетата Y е во видното поле на телескопот, таа ќе може директно да ја детектира – рече Сираџ.