По цели 33 години чекање, Пиза конечно се враќа во италијанската Серија А. Тимот предводен од легендарниот Филипо Инзаги денеска и официјално обезбеди промоција во елитата и тоа и покрај поразот на гостувањето кај Бари со 1-0.

Пресуден беше поразот на Специја, која на гостински терен загуби од Реџана со 2-1. Со тој резултат, Пиза математички го потврди второто место и директниот пласман во Серија А, дури и пред одигрувањето на последните две кола.

Уште во претходното коло Пиза направи огромен чекор со победата над Фрозиноне, по која им беше доволен само еден бод за осигурување на промоцијата, секако, под услов Специја да не ги добие сите преостанати натпревари. Тоа не се случи, па Пиза доби повод за славје и без позитивен резултат на денешниот натпревар.

Претходно, првото место и директниот пласман во Серија А веќе го обезбеди Сасуоло.

Во трката за последното место што води во Серија А преку баражот, ќе се борат неколку екипи. Специја ќе оди директно во полуфиналето на плејофот, исто како и најверојатно Кремонезе. Во борбата за пласман во баражот се и Јуве Стабија, Катандзаро, Палермо и Бари, а шанса има и Чезена која има ист број бодови како и Бари на деветтата позиција.

Во секој случај, следуваат возбудливи две последни кола во Серија Б, каде што ќе се решава кој ќе влезе во битката за последното место во најелитната италијанска конкуренција.

 

View this post on Instagram

 

A post shared by Pisa Sporting Club (@pisasportingclub)