Меѓународната книжевна награда „Наџи Намаан“ е ново признание за македонскиот писател и научен работник Васил Тоциновски. Станува збор за признанија кои се доделуваат во повеќе категории и што имаат своја традиција и континуитет од деветнаесет години во литературниот живот во Бејрут, Либан. Востановени се во 2002 година и „се доделуваат на автори на книжевни дела кои се најеманципирани по содржина и стил, а чија цел е да ги оживеат и развиваат човечките вредности“. Васил Тоциновски е носител на признанието за целокупен опус.

Творечкиот опус на Васил Тоциновски се 91 книга белетристика (поезија, раскази, романи за возрасни и за деца и млади, книжевна критика и есеистика) и македонска литературна историја, потписник е на седумдесет редакции и избори од македонското книжевно и публицистичко наследство, бил соработник во 22 енциклопедии, учебници, прирачници и зборници.

Во земјата и во странство објавил околу две илјади книжевни студии, критики, есеи, записи. Преведуван е на дваесетина јазици и добитник е на триесетина значајни, престижни домашни и странски награди и признанија.

(Текстот е објавен во „Културен печат“ број 94, во печатеното издание на „Слободен печат“ на 21-22 август 2021)