Авиоиндустријата низ целиот свет се соочува со сериозен предизвик – недостаток на пилоти. Побарувачката за летови расте побрзо отколку што компаниите можат да обучат нов персонал, па затоа сега се борат да ги задржат искусните пилоти и да привлечат нови.
За време на пандемијата, обуката на пилоти беше речиси целосно прекината. Кога светот повторно почна да патува, се покажа дека многу инструктори, како и постари пилоти, веќе се пензионирале предвремено. Резултатот е јаз на пазарот на трудот и притисок врз авиокомпаниите итно да најдат решение- објави Бизпортал.

Експертот за воздухопловство Кристоф Клингенберг од Универзитетот во Вормс објаснува дека растот на побарувачката за летови ја изненадил индустријата и дека обуката на нови пилоти не може да го следи темпото на пазарот. Според Бирото за статистика на трудот на САД, само на САД ќе им требаат околу 18.000 нови пилоти годишно во текот на следната деценија, додека Боинг проценува дека до 2044 година, дури 660.000 нови комерцијални пилоти ќе бидат потребни низ целиот свет.

Патот до пилотската кабина не е ниту брз ниту евтин. Цената на обуката во САД може да надмине 100.000 долари, што ги одвраќа многу кандидати од сонот за летање.

Покрај основната лиценца, потенцијалните пилоти мора да добијат ATP сертификат и да акумулираат најмалку 1.500 часа искуство во летање – што обично значи две години дополнителна обука. Сепак, оние што ќе ја завршат обуката се повредни денес од кога било. Авиокомпаниите нудат бонуси, повисоки плати, флексибилни распореди, па дури и платена обука за привлекување нови пилоти.
Професорот по комерцијална авијација од Универзитетот во Невада, Ден Баб, верува дека најефикасниот начин за привлекување нови пилоти е зголемување на платите.
Поради ова, многу компании веќе ги зголемија платите до 30 проценти, а некои нудат бонуси за потпишување во вредност од десетици илјади долари.

Поради недостигот на пилоти, сè повеќе се размислува за зголемување на возраста за пензионирање. До неодамна, границата беше 65 години, но сега се предлага пилотите да летаат до 67 години. Поддржувачите истакнуваат дека современите здравствени стандарди го овозможуваат ова, додека синдикатите предупредуваат на безбедносните ризици и товарот врз постарите пилоти.

Американскиот сенатор Тед Круз неодамна изјави дека продолжувањето на работниот век на пилотите би можело да спречи понатамошно зголемување на цените на авионските билети, бидејќи недостигот на персонал веќе влијае на трошоците на компаниите и патниците.

Иако често се поставува прашањето дали вештачката интелигенција би можела да го замени недостатокот на пилоти, експертите веруваат дека таа ќе биде поддршка, но не и замена. Вештачката интелигенција може да го олесни планирањето на летот, потрошувачката на гориво и безбедносните процедури, но човечкиот фактор сè уште останува клучен дел од секоја пилотска кабина.

Според проценките, пазарот на пилоти би можел да остане во дефицит уште најмалку пет години, сè додека не се надополни обуката и не се зголеми бројот на квалификувани кандидати. Клингенберг проценува дека понудата и побарувачката би можеле да се изедначат околу 2030 година.