Репрезентацијата на Србија разочара со својот настап на Европското првенство и во групата одигра три натпревари во кои освои само два бода и постигна еден гол.

Србија изгуби од Англија со 1:0, ремизираше со Словенија (1:1) и одигра без голови со Данска, така заврши како последна.

По првиот круг српските медиуми пишуваа дека селекторот Драган Стојковиќ-Пикси ќе добие отказ, но тој и понатаму е на клупата. Пикси сега првпат се огласи по заминувањето од Европското првенство и зборуваше за официјалниот сајт на Фудбалскиот сојуз на Србија.

„Зборував со Капело, Венгер, Клоп, Бенитез, Дејвид Мојс…Нивното мислење не се разликува многу од нашата анализа по првенството. Капело ми кажа дека не сме заслужиле да изгубиме од Англија и дека не одигравме така лошо. Мораш да постигнеш гол ако сакаш да победиш. Сите се враќаат на шансите на Митровиќ против Словенија, само една топка да влезеше во мрежата ситуацијата ќе беше поинаква. Сите ми кажаа да ја кренеме главата и да продолжиме да работиме. Разговаравме за освежување на репрезентацијата и идејата за подмладување ми се допаѓа“, изјави Пикси.

Драган Стојковиќ Пикси останува селектор на фудбалската репрезентација на Србија