Поранешниот шпански фудбалер Жерар Пике, наводно ја прекинал врската со својата девојка Клара Чиа, со која беше во љубовна врска последните три години. Веста ја објави шпанската ТВ емисија „Vamos a ver“, а новинарката Адријана Доронсоро за „Марка“ потврди дека парот веќе не е заедно.

Причините за раскинувањето сè уште не се познати, но според Доронсоро, постојат индиции дека во односот можеби биле вклучени и трети лица. Таа изјави дека информацијата доаѓа од извор „многу близок до парот“, иако не прецизираше дали неодамнешното појавување на Пике во Мајами со црвенокоса жена е поврзано со разделбата.

Клара Чиа, која има 26 години и е 12 години помлада од Пике, работи во компанија за спортска и забавна продукција. Таа и Пике често објавуваа заеднички фотографии на социјалните мрежи. Нивната врска беше постојано под лупа на јавноста, особено поради контроверзниот крај на десетгодишната врска на Пике со светската музичка ѕвезда Шакира, со која има две деца – Милан (11) и Саша (9).

Пике живее на релација Барселона – Мајами, каде што живеат и неговите деца, а токму „двојниот живот“, според шпанските медиуми, бил една од причините за тензии во неговата врска со Чиа.

Во јуни 2022 година, Шакира објави дека се разделува од Пике, по повеќе од една деценија заеднички живот и шпекулации за неверство. Оттогаш, пејачката неколкупати го спомна Пике во својата музика со остри зборови, нарекувајќи го дури и „Волдеморт“.

Во изјава за Си-ен-ен, Пике тогаш рече: „Во крајна линија, вистината или она што се случува не се раскажува на вистински начин. Но, не можам да го контролирам тоа. Најважно ми е што сум опкружен со луѓе што ме сакаат, моето семејство и моите пријатели, луѓето што навистина ме познаваат. Тоа ми дава внатрешен мир“.

По разделбата со Шакира, во летото 2023 година, Пике и Чиа се вселија заедно во куќата во која тој порано живееше со поп-ѕвездата. Но, изгледа дека и оваа врска заврши со крај.