Петта жртва почина како резултат на ширењето на легионерската болест во Њујорк, објавија денеска американските здравствени власти, пренесува Еј-Би-Си.

Епидемијата избувна во центарот на Харлем кон крајот на јули. Десетици луѓе се заразени, а од вчера 15 пациенти се хоспитализирани, додека петтата жртва беше пријавена доцна синоќа, според соопштението.

Бактеријата што ја предизвикува легионерската болест беше откриена во 12 ладилни кули во 10 згради, вклучувајќи градска болница и клиника за сексуално здравје, соопштија градските власти на Њујорк. Санацијата на сите ладилни кули е завршена.

Легионерската болест е вид на белодробна болест предизвикана од бактеријата легионела, која напредува во топла вода и се шири преку водоводните цевки во зградите. Епидемијата во Њујорк е поврзана со ладилните кули каде што се користи вода и голем вентилатор за ладење на зградите.

Според американските Центри за контрола и превенција на болести, симптомите на болеста вклучуваат кашлица, треска и главоболка.