Москва очекува предлози за третата рунда преговори со Киев, но дури откако ќе бидат исполнети сите договори постигнати во Истанбул за време на директните преговори со украинската страна, објави денес портпаролот на Кремљ, Дмитриј Песков.

„Завршете ги размените, за кои се договоривме во втората рунда, а потоа ќе чекаме предлози од украинската страна“, изјави Песков за новинарите, пренесува „Раша денес“.

Според Песков, претставникот на руската делегација, Владимир Медински, е во контакт со украинската страна со цел да се исполни сè.

„Водиме директни преговори со претставниците на режимот во Киев. Третата рунда е пред одржување и ќе започне дискусијата за нацрт-меморандумите што претходно ги разменија страните. Зборуваме конкретно за директни преговори, иако тие се водат со медијациски напори на САД“, изјави Песков за новинарите, прецизирајќи дека директните контакти со Украина се одржуваат преку помошникот на рускиот претседател, Владимир Медински.