Портпаролот на рускиот претседател Дмитриј Песков денес изјави дека на стотици илјади Молдавци им е одземена можноста да гласаат на молдавските парламентарни избори, кога станува збор за гласачките места во Русија.

„Од она што го гледаме и знаеме, можеме да потврдиме дека на стотици илјади Молдавци им е одземена можноста да гласаат во Руската Федерација, бидејќи за нив биле отворени само две избирачки места. Ова, се разбира, било недоволно и не можело да им овозможи на сите да гласаат“, рече Песков, пренесува РИА Новости.

Претходно, портпаролката на руското Министерство за надворешни работи, Марија Захарова, изјави дека изборната кампања што ги придружуваше молдавските избори, според самите Молдавци, била најантидемократската во 34-те години независност на републиката.

Владејачката проевропска Партија за акција и солидарност во Молдавија освои 46 проценти од гласовите на парламентарните избори одржани во недела, соопшти Централната изборна комисија (ЦИК) откако беа преброени повеќе од 90 проценти од гласовите. Прорускиот Патриотски блок освои 27 проценти од гласовите, според податоците на ЦИК, објави Ројтерс.