Персеидите пристигнуваат на небото: Како да уживате во најубавиот метеорски дожд, пред да се појави полната Месечина
Еден од најпознатите и најубавите метеорски дождови на северната хемисфера, Персеидите, повторно ќе бидат видливи на ноќното небо, но оваа година гледањето бара малку планирање – бидејќи полната Месечина ќе фрла премногу светлина токму во својот врв.
Препорачано
Персеидите ќе бидат активни од четврток, 17 јули, до сабота, 23 август, а најинтензивни ќе бидат ноќите на 12 и 13 август. Сепак, во тоа време, на небото ќе свети речиси полната Месечина, па ќе бидат видливи само најсјајните метеорски „ѕвезди што паѓаат“.
Обично се препорачува да се гледа метеорскиот дожд од место што е можно подалеку од светлосно загадување, но оваа година полната Месечина ќе го осветли небото во сабота, 9 август, токму кога Персеидите ќе го достигнат својот врв. Во текот на ноќта на најголема активност, Месечината изгрева неколку часа пред полноќ и ќе биде осветлена за дури 84 проценти, па ќе ги „засени“ повеќето метеори со својата светлина, пишува „Лајв саенс“ (Live Science).
Кога и како најдобро да се набљудува метеорскиот дожд оваа година?
Најдобриот период за набљудување на Персеидите всушност ќе биде пред и по врвот, кога Месечината послабо ќе свети. Помеѓу 18 и 28 јули, Месечината ќе биде минимална – четвртина месечина изгрева само околу полноќ на 18 јули, а младата Месечина е на 24 јули. До 28 јули се појавува само слаба, брзо опаѓачка полумесечина, што значи дека ќе имате неколку ноќи со темно небо и солидна шанса да видите ѕвезди што паѓаат.
По врвот, сјајот на Месечината повторно ќе почне да опаѓа, а од 16 август (кога ќе влезе во последната четвртина) постепено ќе произведува помалку светлосно загадување. Иако бројот на метеори ќе биде помал тогаш, сепак можете да видите некои светлечки траги ако небото е ведро.
Што се Персеидите и како се формираат?
Персеидите се познати по своите брзи и светли метеорски траги и се движат со брзина од околу 60 км/с. Тие се формираат кога ситни честички од опашката на кометата „109P/Swift-Tatl“ влегуваат во Земјината атмосфера и согоруваат, оставајќи зад себе прекрасна блескава трага.
Иако условите за набљудување на Персеидите оваа година не се идеални, ако бидете трпеливи и го изберете вистинскиот момент, ќе имате можност да уживате во еден од најубавите небесни спектакли во годината.
