Фудбалерите на Манчестер сити беа елиминирани од Реал Мадрид во плеј-офот од Лигата на шампионите, откако го загубија реваншот со 3-1, продолжувајќи ја агонијата на Пеп Гвардиола.

Менаџерот на „граѓаните“ претрпе 13 порази оваа сезона во сите натпреварувања и, според статистиката на OptaJoe, ова е негативен рекорд во неговата голема кариера.

Гвардиола никогаш не загубил 13 натпревари во една сезона, но да не заборавиме дека уште е февруари и има уште многу натпревари во Премиер лигата, па Шпанецот може да го „подобри“ негативниот рекорд.

Оваа 16 сезона во Лигата на шампионите за Гвардиола заврши во плеј-оф фазата. Тој е на чело на „сините“ од Манчестер од 2016 година. За тоа време тимот ја освои еднаш Лигата на шампионите и уште еднаш стигна до финалето.

Шпанскиот тренер пред Премиер лигата работеше во Баерн три сезони. Секој пат, тимот од Минхен беше елиминиран во полуфиналната фаза.

Гвардиола исто така помина четири сезони на клупата на Барселона. Со Каталонците два пати ја освојуваше ЛШ, а двапати беше елиминиран во полуфиналето.