Последниот извештај на Пентагон содржи стотици нови извештаи за неидентификувани летечки објекти (НЛО) и необјаснети феномени, но нема докази кои укажуваат на вонземско потекло на овие појави, пишува денеска Гардијан, пренесува Танјуг.

Извештајот вклучува 757 случаи пријавени на американските власти од 1 мај 2023 година до 1 јуни оваа година.

Во таа бројка се вклучени и 272 инциденти кои се случиле пред тој период, но претходно не биле пријавени.

Најголем број инциденти се случиле во воздушниот простор над Земјата, додека 49 од нив се забележани на надморска височина над 100 километри.

Во многу случаи, иследниците утврдиле дека „неидентификуваните“ објекти всушност не се ништо мистериозно – тие често излегуваат дека се балони, птици, дронови или сателити.

Гардијан истакнува дека сателитите од системот Starlink, кои припаѓаат на компанијата на Tesla и извршниот директор на X, Илон Маск, се сè почест извор на забуна, бидејќи луѓето често погрешно ги идентификуваат овие групи на сателити како НЛО.

Иако беа објаснети речиси 300 инциденти, стотици други случаи остануваат нерешени, но авторите на извештајот забележаа дека тоа обично значи дека нема доволно информации за да се донесе заклучок.

Во Извештајот се наведува и дека нема пријавени повредени или несреќи за време на тие инциденти.