Министерството за одбрана на САД вчера објави дека наредило повлекување на 700 маринци распоредени во Лос Анџелес минатиот месец, по немирите предизвикани од масовните апсења на нелегални имигранти како дел од операциите наредени од претседателот Доналд Трамп.

Одлуката дојде една недела по повлекувањето на околу половина од 4.000 членови на Националната гарда распоредени во Лос Анџелес.

„Со враќањето на стабилноста во Лос Анџелес, секретарот нареди повлекување на 700-те маринци, чие присуство испрати јасна порака: беззаконието нема да се толерира“, изјави портпаролот на Пентагон, Шон Парнел.

Трамп во јуни нареди распоредување на Националната гарда и маринците во Лос Анџелес, и покрај противењето на гувернерот на Калифорнија, Гевин Њусом, во обид да ги смири спорадичните протести што следеа по големите рации на федералните агенти за имиграција (ИЦЕ).

Тоа беше одлука што предизвика политички тензии во САД. Пентагон ја бранеше мерката, пофалувајќи ги маринците.

„Нивната брза реакција, непоколебливата дисциплина и непогрешливото присуство одиграа одлучувачка улога во воспоставувањето на редот и одбраната на владеењето на правото“, рече Шон Парнел.

Претседателот Трамп сè повеќе се свртува кон војската за зајакнување на операциите против нелегалната имиграција. Министерството за внатрешни работи во април објави дека ќе ѝ додели на американската војска околу 170 квадратни милји (440 квадратни километри) земјиште по должината на границата со Мексико за да се спречи влегувањето на нелегални имигранти во земјата.