Легендарниот италијански фудбалски судија и шеф на судиската комисија на УЕФА, Пјерлуиџи Колина предложи револуционерна промена при изведувањето на пенали.

Колина важи за најдобриот фудбалски судија во историјата, а УЕФА го именуваше за шеф на судиите во 2017 година и бидејќи и понатаму е на таа позиција неговиот предлог би можел да биде усвоен.

Италијанецот сака да се укине правилото фудбалерот да има право од одбиена топка по изведен пенал да постигне гол, односно смета дека играта не треба да продолжи по изведениот пенал без разлика на исходот.

Колина даде и објаснување зошто според него подобро би било да се промени правилото.

„Верувам дека постои голема разлика помеѓу шансите кои ги има голманот и напаѓачот. Во просек реализирани се 75% од пеналите и често тоа е од шанса поголема од таа која била спречена при прекршокот. Покрај тоа напаѓачот има прилика да постигне гол и откако голманот ќе одбрани. Според мене, голманите треба да се жалат затоа што шансите не се еднакви“, изјави Италијанецот.

Своето размислување Колина веќе го презентирал и пред ИФАБ (Меѓнародниот одбор на фудбалските асоцијации) каде што побарал да се разгледа правилото. ИФАБ е надлежен за било какви промени во фудбалската игра.