Кошаркарскиот клуб Пелистер продолжува со формирање на конкурентен тим за новата сезона, а денеска официјално го претстави своето најново засилување, американскиот бек Си-Џеј Вилсон. Искусниот 31-годишен кошаркар во новата сезона ќе го носи „зелено-белиот“ дрес на битолскиот клуб.

Вилсон не е непознат на македонската кошаркарска сцена. Минатата сезона настапуваше за Кожув и важеше за еден од најдобрите во тимот од Гевгелија. Токму неговите одлични настапи беа доволна препорака за раководството на Пелистер да го доведе во своите редови.

Покрај настапите во Македонија, Вилсон има богато интернационално искуство. Играше во Полска, каде што просечно бележеше 22,3 поени по натпревар, што го направи најдобар стрелец во својот тим. Во кариерата беше дел уште од првенства како: Романија, Шведска, Албанија и Босна и Херцеговина.