Кошаркарскиот клуб Пелистер продолжува со засилувањата за претстојната сезона, а ново име во „зелено-белиот“ дрес е американскиот крилен играч Кевин Брејси Дејвис. Клубот од Битола и 30-годишниот кошаркар потпишаа едногодишна соработка, со што Брејси Дејвис стана третото странско засилување на Пелистер ова лето.

Битолчани оваа сезона не само што ќе се натпреваруваат во домашното првенство, туку ќе дебитираат и на европската сцена, па така раководството сака респектабилен тим што ќе се бори на сите фронтови.

Брејси Дејвис, кој е висок 201 сантиметар, има богато европско искуство и досега настапуваше во првенства во Германија, Франција, Финска, Грција, Косово и Израел. Особено се истакна со Трепча, со која ја освои титулата на Косово, додека минатата сезона во Израел бележеше одлични бројки: во просек 18,3 поени, 4,8 скокови и 2,3 асистенции по натпревар.