Повеќе илјади граѓани, предводени од патријархот Порфириј и свештеници на Српската православна црква, се собраа вечерва на протестниот собир „Литија за спас на Србија”, пред зградата на Патријаршијата на СПЦ во Белград. Оттаму, тие започнаа протестна прошетка која заврши пред храмот „Свети Сава“. Патријархот, кој за првпат учествуваше на еден ваков собир, одржа молитва за светоста на бракот и фамилијата.

На собирот беше истакнато дека целта на литијата е да се спречи одржувањето на манифестацијата „Европрајд“, а верниците испратија порака дека ќе се соберат истиот ден, доколку се одржи најавената прошетка на ЛГБТ-активистите, закажана за 17 септември.

Учесниците во процесијата побараа „забрана за промоција на хомосексуална и транссексуална идеологија кај малолетниците”, како и повлекување на веќе донесените закони и забрана за усвојување на сите други закони кои „удираат на христијанските и семејните вредности”.

Граѓаните, свештенството и монасите во поворката носеа икони, крстови, транспарети, но и слики од Путин и четничкиот водач Дража Михаиловиќ, свеќи, знамиња на Србија и големо знаме на Русија, а кон поворката се приклучија и членовите на мото-клубот „Ноќни волци”.

Патријархот Порфириј рече дека „Бог утврдил што е природно, а што неприродно”. Во говорот што следеше по молитвата, тој изрази противење на „Европрајд“, велејќи дека целта на ваквите настани е „да го преобликуваат општеството и нашиот начин на живот, без ние да го бараме тоа”.

-Затоа, за нас православните христијани, ЛГБТК+ идеологијата е неприфатлива. Но, ние зборуваме како христијани и затоа нагласуваме дека истовремено сме против сите видови насилство, дека сме против презир, омраза, прогон и жигосување на оние кои ги делат тие идеи, особено ако насилството се шири во името на црквите и името на Христос, рече срспкиот патријарх.