Повеќе владејачки партии вчера и денеска ја обвинуваат опозициската ВМРО-ДПМНЕ дека останала режимска партија откако полицијата вчеравечер го уапси новинарот од „Портал икс“ Фуркан Салиу со образложение дека новинарот нападнал полицаец на фудбалски натпревар, а во неговото возило е пронајден пиштол. Салиу негираше дека нападнал полицаец, а за пиштолот рече дека имал дозвола.

Според Салиу, на натпреварот што се одригра во Средно Коњаре помеѓу „БВК Коњаре” и ФК „Куманово“ настанал тотален хаос меѓу навивачите, а полицијата била без координација и почнала да тепа недолжно момче, што Салиу го снимил со мобилен телефон.

– Ми го земаа телефонот, ме уапсија мене дека сум пружал отпор. Ме товарат дека сум нападнал полицаец. Нека го докажат тоа, од утре ќе се извинам и ќе се тргнам од екраните. Имаше таму полицајци кои снимаат, имаше камери од страна, нека докажат дека јас сум удрил полицаец… – рече Салиу по излегувањето од полициската станица.

Тој додаде дека е ослободен само затоа што работи како новинар, а во спротивно би завршил во притвор. Според него, натпреварот бил од висок ризик, а полицијата не се снашла, па дури и на полувремето, пред инцидентот барала помош од него да ги смири навивачите.

За пиштолот Салиу рече дека полицијата му го претресла автомобилот во негово отуство, каде го пронашла пиштолот, за кој вели дека го чувал расклопен. На новинарско прашање дали е апсењето е обид за негово замолчување откако деновиве објави документи за кои тврди дека покажуваат дека ВМРО-ДПМНЕ направила оперативен план за пласирање лажни вести и лажни анкети, Салиу кажа дека не сака да верува во такво нешто.

Претседателот на СДСМ Димитар Ковачевски денеска рече дека се потврдило дека ВМРО-ДПМНЕ функционира исто како до 2016 година.

– Се потврди дека оние анкети кои на националниот сервис се презентираа се факсификат. Злоупотреба на медиумски серивс од истата партија која го правеше тоа до 2016 година, на ист начин, со исти актери и со ист начин на финансирање. Вчера имавме театарлано апсење на истиот новинар што ја обелодени таа афера. Тој новинар не е нежен ни према мене, гледајте какви прашања поставува, но, ние гледаме на медиумите како на демократски коректив на Владата – рече Ковачевски во интервју за „Фронтлајн“.

Синоќа тој со статус на Фејсбук силно го осуди апсењето на Салиу.

„Употребата на сила против новинарите страшно потсетува на мрачните времиња од минатото кога немавме слобода и демократија и бевме заробена држава. Заплашување на новинари, злоупотреба на моќта и на институцијата МВР е недозволиво“ напиша тој.

И министерот за внатрешни работи Панче Тошковски вчеравечер реагираше со статус на „Фејсбук“, со кој ги повика политичките партии, здруженијата, синдикатите и другите релевантни фактори да се воздржат од давање изјави и соопштенија со кои се врши притисок кон полицијата и да остават полициските службеници професионално да ја завршат работата, без политика.

„Приведувањето на лицето Ф.С. од Скопје е последица на извршен напад на полициски службеници, припадници на Единицата за брзо распоредување кои биле ангажирани за одржување на јавен ред и мир на фудбалски натпревар кој бил оценет како натпревар со безбедносен ризик, а кои во моментот на нападот од наведеното лице интервенирале бидејќи дошло до обид домашната публика да се пресмета со гостинските играчи. По приведувањето е извршен преглед на автомобил во негова сопственост, каде е пронајден пиштол. Од страна на полициски службеници истиот е приведен во полициска станица каде ќе биде извршен разговор и ќе бидат преземени сите потребни мерки и активности за целосно расчистување и документирање на настанот“, напиша Токовски.

Тој додаде и дека ја разбира загриженоста на Здружението на новинари и Синдикатот на новинарите, „но МВР мора да постапува еднакво кон секој кој ќе нападне полициски службеник“.

ЗНМ и ССНМ апелираа случајот веднаш да биде расчистен, да се внимава да не се повредат правата на колегата Салиу, а политичките партии да не го користат во своите дневно-политички препукувања и за партиски цели на изборната кампања.

СДСМ во партиската реакција истакна дека тие за седум години власт, не само што не уапсиле ниту еден новинар, туку донесле низа законски решенија со кои се гарантира заштитата на новинарите.

„Апсење на новинарот Фуркан Салиу покажува дека во ВМРО-ДПМНЕ нема промена и оти тоа е режимска партија. На сите им е јасно дека ова е обид за замолчување и заплашување откако новинарот објави афера директно поврзана со ДПМНЕ“, се вели во соопштението на СДСМ.

Од НСДП соопштија дека Салиу е новинарот кој го открил планот на ВМРО-ДПМНЕ за ширење на лажни вести.

„ВМРО-ДПМНЕ преку нивниот министер за внатрешни работи и началниците кои ги поставија продолжува да го спроведува едно од трите П кои се нивен заштитен знак – пари, пропаганда и пендрек. ВМРО-МВРО уште еднаш го покажа вистинското лице, како планираат да владеат и како ќе се однесуваат кон оние кои јавно ги откриваат нивните афери“, соопшти НСДП.

Од ВМРО-ДПМНЕ, пак, преку соопштение одговорија дека „СДСМ наместо да води лицемерна политика, одговорите да ги побара во признанието на самиот Салиу дека поседувал оружје и дека со своето однесување придонел кон ескалација на настаните“.

Партијата потсети на изјава на Оливер Спасовски дека „нападот кон полицаец, е напад кон државата“ и го праша СДСМ зошто за нив нападот врз полицаец за кој се сомничи Фуркан Салиу, не е напад врз државата?