Вардар трета година по ред ќе биде дел од завршниот турнир во Келн и ќе се бори за титулата во Лигата на шампионите.  Успехот на Вардар добива на тежина поради тешката финансиска состојба во која се наоѓа клубот, им се должат девет плати на ракометарите кои сите имаат исписници. Тренерот Роберто Гарсија Парондо, за весникот „Ас“ вели дека сопственикот Сергеј Самсоненко им ветил дека ќе им ги исплати сите долгови.

–  Пласманот во Келн го заслуживме иако имавме тешка и комплицирана сезона. Вардар беше шампион пред две години и изненадувачки е што таму стигнавме и оваа сезона. Тимот има добиено плата само за еден месец, а потоа целата сезона добиваме по само 500 евра, кои се загарантирани со закон. Во Македонија не можете да живеете со 500 евра, па кога некој има потреба за повеќе пари, оди кај претседателот и тој му дава одредена сума. Претседателот го призна долгот и пред нотар и не осигура дека на никој нема да му се должи ништо и дека тимот не треба да биде во очај иако немаме идеални услови за живот – вели Парондо во интервјуто.

Тренерот истакна дека сите во клубот добиле ветување дека Вардар го чекаат подобри денови, бодејќи веќе се формирани иницијативи за спас предводени од почесниот претседател на „црвено-црните“ Михајло Михајловски.

– Пред дуелот со Пик Сегед во четвртфиналето во ЛШ не информираа дека клубот нема иднина и дека сите треба да си бараме клубови за следната сезона, дека клубот ќе згасне. За среќа сега има најави за подобри денови и можеби ќе има решение. Тоа секако се добри вести за ракометот во Македонија, бидејќи Вардар има многу навивачи – вели Парондо.

Успесите со Вардар не останаа незабележани, и Парондо веднаш си најде ангажман како селектор на репрезентацијата на Египет.

– Ракометната федерација на Египет дозна за финансиските проблеми во Вардар, ми испрати авионски билет и одлуката да ја прифатам селекторската функција ја донесов – додава Парондо.