Цената на парното сега засега останува иста, се додека Регулаторна комисија не го добие извештајот за проценка на вредноста на основните средства што се користат за производство на топлинска енергија. РКЕ очекува извештајот да им биде доставен во септември или најдоцна во октомври, кога ќе се донесе нова одлука за цената на парното греење.

РКЕ изврши длабинска анализа на доставените податоци за работата на компаниите кои вршат производство, дистрибуција и снабдување со топлинска енергија во Градот Скопје. Констатиравме дека за донесување на одлука која ќе ги рефлектира во целост реалните трошоци на сите регулирани дејности, посебно производство на топлинска енергија, дополнително е потребна проценка на вредноста на основните средства – топланите, соопшти претседателот на Регулаторна комисија, Марко Бислимоски на денешната прес конференција.

Комисијата уште во февруари испратила барање за процена на основните средства за дејноста производство до Бирото за процена, но до денес го нема добиено извештајот и поради тоа не може да се направи финална пресметка.

Одлуката за продолжување на важноста на сегашната цена се однесува на потрошувачите кои се снабдуваат од сите три системи Топлана Запад, Скопје Север и ЕСМ Енергетика за да се овозможи ист третман на сите граѓани чии домови се греат на парно. Како што посочи Бислимоски, ова не е првпат РКЕ да не донесе одлука во јули, потсетувајќи дека истото се случило и во 2023 поради проблеми во однос на цевководот на мостот „Беласица“.

Така што оној момент кога ќе ја добиеме проценката ќе пристапиме кон утврдување на цената на сите претпријатија коишто вршат дејности поврзани со топлинската енергија. Во текот на септември или најдоцна во октомври ќе се добие проценката и тогаш ќе се утврди цената – рече претседателот на РКЕ.

Инаку со последната одлука од 1 февруари цената за потрошувачите на топлинска енергија во Град Скопје беше зголемена за 5,03 %, како резултат на зголемената цена на природниот гас на светските берзи за 16 % во последниот квартал од 2024 година.