Група вработени во затворот во Штип, членови на синдикалната организација на УПОЗ, но Независниот полициски синдикат ја демантираат приказната на директорот на Управата за извршување на санкции, Александар Пандов со кучката Цеца и обвинувањата за полицајците за поврзаност со осудениот од „Детонатор“, Жан Железарски, кој барал дрога во затворот.

– Како вработени во установата во целост ја негираме ваквата лошо составена приказна која се пласираше на ироничен начин и со цинизам во јавноста, одговорно тврдиме дека вистината е сосема поразлична и постапувањето во однос на пронаоѓањето на сомнителни предмети фрлени од страна на лицата кои дојдоа до затворот во овој настан преку безбедносниот ѕид беше во правец на тоа да го пронајдеме она што е фрлено и доколку има било што недозволено да го одземеме и да пријавиме во СВР – Штип – се вели во реакцијата од Синдикатот на УПОЗ.

Во текот на ноќните часови потрагата заврши без успех, додаваат во реакцијата, но во текот на утринските часови со самото разденување повторно е направен обид да се пронајдат предметите при што успешно е пронајдена најлонска кеса, во која е пронајдена и сомнителната прашеста и тревеста материја.

Вработените велат дека по пронаоѓањето биле преземени сите оперативно-протоколарни дејствија, бил известен директорот на установата, а настанот бил пријавен во полиција при што инспектори од СВР – Штип и крим-полиција пристигнале во затворот и пронајдената кеса е предадена за понатамошно постапување.

-Целото постапување и преземените конкретни чекори е содржан во самиот дневен извештај на затворската полиција, а со сигурност го има и во полицискиот билтен од СВР Штип. Во ниту еден момент нема простор за сомнеж дека некој од затворските полицајци постапувал спротивно на своите работни задачи и соработувал со осуденото лице во негова полза како што беше споменато на прес-конференцијата од страна на директорите – реагираат од Синдикатот на УПОЗ.

Според Независниот полициски синдикат пак Пандов не ја објавува реалната состојба, туку прави шоу за граѓаните со цел омаловажување и дискредитирање на колегите.

– Сметаме дека секој настан треба да биде истражен професионално и со должно внимание и да се избегнува јавна осуда пред да биде завршена постапката, а до нас доаѓаат информации од колегите дека изнесените ставови на директорот во целост не соодветствуваат со истрагата и евидентираните преземени мерки во дневниот извештај – се наведува во реакцијата.

Независниот синдикат на полицијата бара од директорот и од сите останати функционери кои периодов ја коментираат работата на полицијата во иднина кога објавуваат или коментираат работа на полициските службеници тоа да го прават со внимание по завршувањето на постапките во целост.

Пандов во средата откри случај во кој топка во која имало ставено 35 грама бела прашеста материја, најверојатно кокаин, и 50 грама марихуана била фрлена во дворот на затворот во Штип, а во инцидентот во кој осуденик ја барал дрогата биле вклучени и затворски полицајци.

Пандов рече дека возило ги поминало двете капии на затворот, а не било запишано од затворскиот полицаец, а потоа совозачот во дворот ја фрлил топката и заминале. Во барањето на „нештото“, како што рече Пандов, бил вклучен познат затвореник, а потоа на него му се приклучиле и затворски полицајци кои со батериски лампи го осветлувале тревникот. Според кажувањето на Пандов, затвореникот рекол дека во тревникот го бара часовникот што му го земала кучката Цеца.

Управата за случајот поднела и кривични пријави во Обвинителството.