Малите домашни винарници и пиварници веќе не се новост во Македонија. За жал, пандемијата силно удри и по овој сектор. Сепак, тие грчевито се борат за опстанок, а се создаваат и нови брендови на „занаетчиски“ пијалаци.

Во Македонија има 7 регистрирани мали пиварници и четворица производители на пиво од хоби. Домашните производители на пиво добиваат суровини од продавницата „Пиводром“, која е увозник на сè она што им треба за да направат пиво. Нејзиниот сопственик Предраг Јованчев може да се каже дека е пионер во Македонија за развој на овие неиндустриски, таканаречени крафт-пива, или како што уште ги нарекуваат занаетчиски произведени пијалаци.

– При една посета на Копенхаген во ноември 2016, одбрав посета на микро-пиварница како една од многуте туристички атракции на овој град. Како дел од посетата беше и дегустација на нивното крафт-пиво, кое беше најдоброто пиво што го имам пробано дотогаш. Водичот ме изненади со информацијата дека и самиот дома си прави пиво. Откако се вратив, почнав да истражувам и дознав дека правењето пиво е навистина интересно, креативно и популарно хоби во многу земји во светот. Посакав и јас да си направам свое пиво, но за жал основните состојки и опрема ги немаше во Македонија, па морав да се снаоѓам и да барам во странство. Тоа ми даде идеја да го започнам овој бизнис и на идните македонски производители да им овозможам лесен пристап до суровини, опрема и знаење за уживање во ова интересно хоби, но за некои и мал бизнис – вели Јованчев.

Јованчев во разговор за „Слободен печат“ вели дека сега работата е тргни-застани.

– Знаете каква е актуелната ситуација. Рестрикции, олабавување мерки, пак рестрикции… Во Македонија има регистрирани производители на крафт-пиво и ние ги снабдуваме со потребните суровини. Но, она што сега го продаваме како суровина е многу помалку отколку пред пандемијата. Преку нашата продавница продаваме пива од две домашни мали пиварници. Секако, како и суровините, така и пивото, многу помалку се продава. Инаку, ние и увезуваме крафт-пива од странство и ги продаваме онлајн. Порано увезувавме и по 100 различни крафт-пива од 5-6 странски пиварници, а сега увезуваме 50-ина видови. Инаку, крафт-пива увезуваме од разни земји – од Белгија, Унгарија, Хрватска – вели Јованчев.

Производството на „занаетчиски“ пива во Македонија почна наголемо да се промовира, а на прагот на 2020 година имаше и неколку организирани настани на кои можеа да се пробаат крафт-пивата. Јованчев вели дека пред пандемијата редовно одржувале и обуки за правење пиво во домашни услови.

– Имаше интерес за производство на домашно пиво. Некои сакаа тоа да го научат заради себе, а некои за да направат бизнис. Обично вакви пиварници самостојно се поврзуваат со некој бар што е заинтересиран да стане препознатлив по разни видови пива. Овие пива сепак се поскапи и не се за во „помасовни“ ресторани. Обично сопствениците на такви ресторани не се заинтересирани за нив – објаснува Јованчев.

Сепак, крафт-пивата веќе пишуваат своја приказна и во Македонија. Веќе 5 години се одржува и манифестацијата Пивски салон. Минатата година таа беше одложена поради пандемијата, но годинава, на крајот на јуни се одржа на отворено.

Според некои податоци, крафт-пивата се најбрзорастечки сегмент во рамките на алкохолните пијалаци во светот.

За една година регистрирани 40 семејни винарници

„Занаетчиски“ место индустриски начин на производство е сè поактуелен тренд и во винарството. Во екот на пандемијата, лани во јули, Владата ги олесни условите за упис во регистарот на производители на вино на физички лица и мали винарски визби. Малите винарници со капацитет на преработка и чување вино до 30.000 литри годишно, наместо да плаќаат 10.000 денари надоместок за регистрација сега плаќаат 1.500 денари, а за винарски визби со капацитет на преработка и чување вино над 30.000 литри надоместокот е намален за половина, односно тие плаќаат 5.000 денари годишно. Со овие олеснувања, за една година, и тоа во пандемија, во државата се регистрирани четириесетина семејни винарници.