Љупчо Палевски има многу прашања за Влатко Кешишев на денешното рочиште. Прво го праша зошто, кога Кешишев ќе слушне збор „ранец“, тој одговарал на тема „пиштол“ со кој се извршени убиствата.

-Претпоставувам дека пиштолот е во ранецот. Ако имаше пиштол во тебе, на твоето тело, ќе се препознаеше, ќе се видеше преку маицата. Затоа претпоставувам дека пиштолот бил во ранецот со моторолите – рече Кешишев.

Запрашан од Палевски, дали при претресот на штабот на Десна биле изнесени мачета од половина метар и плашливец пиштол копија на „берета“, одговори негативно.

-Немам видено дека изнеле мечета и плашливец пиштол – рече Кешишев.

Кешишев повтори дека кога го транспортирале од судот до затворот бил сместен во комбе со Љупчо Палевски каде Палевски наводно му дал писмо, да го препише со свој ракопис и да го прати во судот. Кешишев рече дека кога го препишал листот даден од Палевски, го фрлил оригиналот.

Кешишев писмено барал од директорот на затворот КПУ Скопје да го раздели од Велибор Манев зашто му врши притисок.

-Уште имам стравопочитување кон тебе – му рече Кешишев на Палевски.

На судењето стана збор и за походот за копање злато во Демир Капија каде што Палевски беше фатен со свој пиштол од страна на МВР. Според Кешишев таа идеја за златото да се бара во Демир Капија била на Велибор Манев.