Најмалку девет туристи загинаа кога поплавите предизвикани од монсунските дождови однесоа деца во река во северен Пакистан, а роднините скокнаа во водата за да се обидат да ги спасат, соопштија денес официјални лица.

Администраторот на округот, Шехзад Махбуб, за Ројтерс изјави дека семејството појадувало покрај реката Сват, а децата биле во водата и фотографирале кога се случила ненадејната поплава.

Тој рече дека досега од реката се извлечени девет тела, дека четири члена на семејството се спасени и дека сè уште е прерано да се каже колку деца и колку возрасни починале.

Локалното население и повеќе од 80 спасувачи бараат преживеани, изјави службеникот за спасување Шах Фахад.

Семејната група се состоела од туристи од Пакистан кои ја посетувале долината Сват, изјави локалниот градоначалник Шахид Али Кан.