Комисијата за одлучување по прекршок при Комисијата за заштита на конкуренцијата во поведена прекршочна постапка донесе решение за изрекување на прекршочна санкција за Сојузот на стопански комори на Македонија заради давање на неточни, нецелосни податоци и податоци кои можат да ја доведат во заблуда Комисијата за одлучување по прекршок.

Имајќи ги предвид тежината на прекршокот и последиците предизвикани од прекршокот, износот на глобата е утврден во висина од 0.8747 отсто, од приходите на ССКМ остварени во 2024 година, велат од КЗК.

-Комисијата по допрен глас поведе постапка против Сојузот на стопански комори и против четири големи ланци на маркети заради постоење на сомневање за картелско здружување што е строго забрането согласно член 7 од Законот за заштита на конкуренцијата. Во текот на постапката иако претходно опоменати од страна на овластените лица од Комисијата за заштита на конкуренција дека давањето на неточни и нецелосни податоци е казниво согласно член 61 став (1) точка 10) од Законот за заштита на конкуренцијата, извршниот директор и потпретседателот на Комората свесно давале неточни податоци за улогата на Комората и нејзините овластени лица во организацијата на склучувањето на забранет договор (картел) помеѓу четирите големи ланци на маркети – детализираат од КЗК.

При контрола на службената комуникација на овластените лица во Комората од страна на Комисијата за заштита на конкуренцијата јасно е утврдено дека тие имале активна улога во процесот на договарање и свесно давале неточни и нецелосни податоци заради избегнување на одговорноста за картелско здружување.

Во февруари КЗК, соопшти дека повела прекршочна постапка против неколку ланци маркети кои се договарале за цени на производи. Имено, како што беше наведено, трговските ланци се договориле да не набавуваат стоки од добавувачи кои ќе достават нови ценовници.

-Контролираните субјекти спротивно на Законот за заштита на конкуренцијата донеле забранета одлука односно се договориле дека ќе делуваат усогласено и нема да набавуваат стоки од добавувачи кои ќе достават нови ценовници за нивните производи, поради што е поведена прекршочна постапка – објаснија од КЗК.

Незаконското делување било откриено при ненајавена контрола во четири трговски ланци и во една од стопанските комори во која тие биле здружени.

Како што информираа од Комисијата, при увидот во службената документација и во средствата за електронска комуникација во службените простории на фирмите биле пронајдени докази за незаконската одлука која ја донеле и која, како што се наведува, јавно ја објавиле преку средствата за јавно информирање.