Лековите за слабеење, како што се Оземпик и Вегови, кои во последниве години станаа популарни поради нивната ефикасност во контролата на дијабетесот и намалувањето на телесната тежина, предизвикуваат губење на косата, покажуваат резултатите од ново канадско истражување.

Во студијата спроведена од истражувачи од Универзитетот на Британска Колумбија се наведува дека најчестиот несакан ефект на лековите за слабеење е зголемениот ризик од губење на косата, пренесе „Њујорк пост“.

Истражувачите анализирале податоци од 1.926 корисници на лекови за слабеење со семаглутид и 1.348 корисници на бупропион-налтрексон, друга група лекови за слабеење.

Откриле дека корисниците на семаглутид биле изложени на 50 отсто поголем ризик од губење на косата во споредба со втората група.

Исто така, жените биле двојно повеќе изложени на ризик од мажи да ја изгубат косата при користење на семаглутид.