Земјоделските производи во август, во просек, биле поскапи за 12,1 проценти во споредба со истиот месец лани, покажуваат податоците на Државниот завод за статистика. Најмногу поскапел компирот – за дури 76,6 проценти. Следат овошјето и грозјето со 32,8, а растот на цените кај зеленчукот, во просек е 6,2 проценти, соопшти Државниот завод за статистика.

Кај растителното производство во целина е регистрирано зголемување за 14,2 проценти, а кај животинското производство – 6,5%.

Истовремено, трошоците што ги имале земјоделците исто така бележат нагорно движење, но само од 2,3%. Најмногу поскапеле ветеринарните услуги – за 37,1%, а потоа добиточната храна за 9,9%. Поевтинување има кај енергијата и горивата за 5,2 проценти, како и кај минералните ѓубрива за 1,6 и семињата – за 0,2%.

Средствата наменети за инвестиции во земјоделството во август се повисоки за 5,7 проценти.