Времето во мај годинава било постудено од вообичаено, додека врнежите биле во рамките на долгогодишниот просек, со исклучок на Охрид, каде врнело најмногу од 1991 година, велат од Управата за хидрометеоролошки работи во анализата на мерењата и набљудувањата на метеоролошките станици во државата минатиот месец.

– Средномесечната температура на воздухот се движеше од 9,9°С во Маврово до 18,4°С во Гевгелија. Споредено со просечните мајски средномесечни температури, за триесетгодишен период (1991-2020), овогодинешната беше подпросечна за 1,4 степени на ниво на држава, велат од УХМР.

Највисоката максимална температура беше измерена на 4 мај во Гевгелија и изнесуваше 29,9 степени Целзиусови. Најниската минимална температура во текот на месецот беше измерена во Берово, на 15 мај и изнесуваше 0 степени Целзиусови.

– Во месец мај 2025 година месечната сума на врнежи во државата варираше од 45мм во Скопје – Зајчев рид до 88мм во Охрид. Максимално дневно количество на врнежи од дожд, од 24мм, беше регистрирано во Охрид на 17-ти во месецот, велат од УХМР.

Споредено со мајската просечна вредност за многугодишен период (1991-2020), измерената месечна сума на врнежи била просечна – 65мм на ниво на држава, се вели во извештајот.