Некои од најпосакуваните туристички дестинации во Европа последниве години имаа проблеми со прекумерниот туризам. А, експертите за патување идентификуваа пет популарни локации кои патниците треба да ги избегнуваат во 2025 година, пишува „Експрес“.

Барселона

Тимот од експерти на „Фодор травел“ (Fodor’s Travel) објави: „Барселона моментално има повеќе од 10.000 лиценцирани туристички апартмани на платформи како Ербиенби, а просечната цена за изнајмување на стан е зголемена за 68 отсто во последните десет години“.

Иако градската власт вети дека до 2028 година ќе ги укине сите лиценци за краткорочно изнајмување и ќе ги пресече дивите туристички станови, многу жители сметаат дека ваквата реакција е задоцнета.

На платформата „Редит“, локалните жители ги споделија своите мислења за проблемот со туризмот во Барселона. Еден корисник напиша: „Барселона се претвори во забавен парк за туристи. Сè е прескапо. Кога одам на работа или на предавања, морам да избегнувам туристи кои ненадејно застануваат да се фотографираат – во секое време од денот, неделата или годината“.

Друг додаде: „Локалните жители се истиснати од нивниот град поради туризмот. Локалните продавници се затвораат бидејќи туристичките бизниси се попрофитабилни“.

Историскиот готски кварт е една од најтешко погодените области, бидејќи е дом на голем број туристички апартмани и атракции.

Мајорка

Овој прекрасен шпански остров со децении беше популарна дестинација за Европејците и претходно беше на листата на „Фодор травел“. Иако летовите од Велика Британија често се достапни за помалку од 50 фунти повратен билет, зголемениот број посетители доведе до „неверојатен метеж“ на некои од најпознатите плажи и градови.

На „Трипадајзор“, еден посетител напиша: „Плажата Кала Деја е толку преполна што полицијата го регулира сообраќајот на влезот, а цените се астрономски. Морето мириса на канализација. Луѓе, избегнувајте го ова место. Ова не е најдобрата вредност за парите – сето тоа е полно со инфлуенсери на Инстаграм. Какво разочарување“.

Балеарската влада воведе туристичка такса во 2016 година, а таа дополнително ќе се зголеми во 2025 година во текот на јуни, јули и август. Овој данок важи и за Менорка, Ибица и Форментера. Покрај тоа, британската амбасада и локалната власт воведоа ограничувања за одредени одморалишта, вклучително и забрана за продажба на алкохол во текот на ноќта за да се спречи „прекумерниот туризам“.

Канарските острови

Минатото лето низ Европа избувнаа протести против прекумерниот туризам, а на плажите на Мајорка и на Канарските острови се собраа десетици илјади луѓе со транспаренти на кои пишуваше: „Вашиот луксуз, нашата беда“ и „Жителите на Канарските острови имаат свои граници“.

Иако туризмот носи значителни економски придобивки – на Канарските Острови сочинува дури 35 отсот од БДП и генерира 16,9 милијарди евра во 2023 година – локалното население се почесто укажува дека овој приход не стигнува до нив, пишува „Експрес“.

Нестор Мареро Родригез, секретар на Здружението на пријатели на природата во Тенерифе, изјавил: „Британските туристи несомнено се однесуваат најлошо и реагираат драматично кога ќе се соочат со нивното однесување и отфрлање од локалното население“.

Водич од „Гран Канарија“ ја истакна потребата од одговорен туризам, посочувајќи дека иако многу британски туристи се љубезни, значителен дел од нив доаѓаат исклучиво за сонце и евтин алкохол, што често резултира со проблематично однесување.

Лисабон

Жителите на Лисабон, град во кој бројот на пристигнувања на туристи значително е зголемен во последните години, изразија стравување дека ќе ја доживеат истата судбина како Венеција.

Со население од околу 546.000 луѓе, португалскиот главен град прима меѓу 30.000 и 40.000 туристи секој ден. Веќе во 2018 година, еден новинар за „Телеграф“ изјави: „Во Лисабон и Порто, централните градски области станаа исклучиво туристички зони. На пример, лисабонскиот центар, која зафаќа само 1,5 квадратни километри, сега има повеќе од 70 хотели, додека рестораните, продавниците за сувенири и големите меѓународни брендови ги преполнија локалните продавници“.

„Фодор травел“ наведува дека дури 60 отсто од сместувачките единици во Лисабон сега се наменети за краткорочно изнајмување, што ја намалило понудата на долгорочни станови и значително ги зголеми цените на недвижностите.

Венеција

Италијанскиот град, познат по своите канали, историја и уметност, постојано е преплавен со туристи. Според една неодамнешна студија, Венеција има 21 турист на секој жител. Иако властите воведоа „дневна туристичка такса“ и забранија влез на големи бродови за крстарење во лагуната, проблемот со прекумерниот туризам останува, а УНЕСКО дури ја вклучи Венеција на својата листа на загрозени градови.

Градот дополнително ја зголеми туристичката такса воведена во 2024 година – таа сега е 10 евра за патниците кои резервираат помалку од четири дена однапред.

Овие мерки покажуваат дека популарните европски дестинации преземаат сè посериозен пристап во борбата против прекумерниот туризам. Ако планирате патување, можеби ќе сакате да размислите за помалку посетени локации кои ќе ви дадат поавтентично и поопуштено искуство.