Ова е судење за цел еден систем на неказнивост, порача таткото на Фросина Кулакова
„Сите коски ѝ беа скршени, срцето пукнато, градниот кош отворен. Тоа не беше прегазување, туку маскар. Зошто во последен момент свртел лево, а не продолжил право, дали имало некаква збеснатост дека никој ништо не му може? Ова е судење за цел еден систем на неказнивост“, изјави таткото на Фросина Кулакова на денешното судење.
Препорачано
– Длабоката коруптивност нè доведе во оваа ситуација, порача тој низ солзи.
Според него, еднакво се виновни двајцата родители затоа што му дале автомобил иако претходно имал низа сообраќајни пропусти.
Законските застапници предјавија имотно правно побарување и кривичен прогон.
Претходно, мајката на Фросина во емотивно обраќање порача дека мора да има максимална казна, не за одмазда, туку нејзината смрт да не биде залудна.
-Кој збор од Законот може да го опише ова, болката која ја чувствувам секој миг? Ова не е судење за сообраќајка, ова судење е за грабеж на живот, за грабеж на иднина, за убиство. Барам највисока казна, не за одмазда, туку за ниедно дете да не ја доживее нашата судбина. Покажете дека правдата има душа и дека злосторството нема да помине. Ќе ми ја вратите вербата дека нејзината смрт не била залудна, за животот, за човечноста – додаде таа.
На 29 јануари годинава, Јованов, без возачка дозвола и под дејство на алкохол, управувал возило со брзина од 91 километар на час на булеварот „Партизански одреди“ во Скопје. На пешачки премин, на црвено светло, удрил во Фросина Кулакова, која поминувала на зелено светло за пешаци. Од силата на ударот, Фросина се здобила со тешки телесни повреди и починала на самото место. За делото за кое се товари Јованов е предвидена затворска казна до 20 години.
Судењето започна денеска, со задоцнување од речиси еден час поради доцнење на спроводот од притворот во Шутка. Случајот го води судијката Снежана Марковска.
ФОТО | Обвинетиот за прегазувањето на Фросина седна на обвинителна клупа со наведната глава
Јованов седна на обвинителна клупа со наведната глава.
Во меѓувреме, Основното јавно обвинителство Скопје поднесе обвинителен предлог и против таткото на Васил, Зоран Јованов, за кривично дело „предизвикување општа опасност“ од член 288 став 4 во врска со став 1 од Кривичниот законик.
Обвинението се однесува на периодот од 04.11.2022 до 30.01.2025 година, во кој Зоран Јованов му дозволувал на својот син Васил Јованов да управува со патничко моторно возило „пежо 207“, иако знаел дека синот нема возачка дозвола и е повеќекратен сторител на сообраќајни деликти вклучително и сообраќајната несреќа во која животот го загуби 22-годишната Фросина Кулакова.
