Македонија следната недела ќе биде домаќин на лидерскиот самит на инцијативата Отворен Балкан во Охрид. Според најавите покрај најавеното присуство на лидерите на Македонија, Албанија и Србија се очекува да пристигне и црногорскиот премиер, Дритан Абазовиќ кој како што пренесоа дел од медиумите можно е и да објави придружување на Црна Гора во регионалната иницијатива.

Токму предизвиците и придобивките од оваа регионална соработка но и што Македонија како домаќин може да понуди ново на балканските држави се дилемите кои деновиве се во фокусот на домашната јавност, додека контурите на европерспективите на регионот стануваат се појасни како резултат на бугарското вето.

Поранешниот амбасадор, Нано Ружин за „Слободен печат“ коментирајќи ги очекувањата од одржувањето на самитот во Охрид вели дека земјава треба да понуди нови перспективи на соработка во туризмот, земјоделството, енергетиката…

– Постои едно правило дека дијалогот и соработката се најдобрите алатки во услови на криза. Ние гледаме дека светот, Европа и Балканот ќе се соочат со голема економска и енергетска а можеби и бебедносна како резултат на Украина. Затоа овие мали држави како Србија, Албанија, Македонија па и Косово и Црна Гора пожелно е да соработуваат на овој план и практично да направат еден вид соработка кој ќе го олесни животот на граѓаните. Тоа не е алтернатива на ЕУ но е извонредно предворје, бидејќи кога ќе станеме членка сите тие погодности кои ги нуди Отворен Балкан ќе се почитуваат понатаму и како членки во ЕУ – оценува Ружин.

Според поранешниот амбасадор во НАТО Ружин „Отворен Балкан” во Македонија ќе отвори решенија на многу затворени проблеми.

Политичкиот аналитичар Синиша Пекевски смета Македонија треба да ја користи секоја можност за напредок и оваа регионална соработка е добра затоа што ги отстранува голем дел од пречките за слободен транспорт и соработка на компаниите од овие земји.

– Отворен Балкан не е пандан на ЕУ и не може никогаш да биде. Она што треба Македонија да го прави е да ги бара сите можности каде може да профитира во еконосмка смисла, фокусот на македонските компании треба да биде извозот а македонската влада треба силно да ги поддржува тие компании. Се сомневам дека може да искористиме многу поради кризата во Украина заради капацитетите кои ги имаме, недостатокот на човечкиот кадар а и инфраструктурната основа, за која впрочем вчера ни ја нагласи и нобеловецот Кругман – оценува Пекевски.

Според Пекевски иако иницијативата Отворен Балкан се смета за резултат на разочарување од недостигот на опиплив напредок кон членството во ЕУ, таа на крајот би можела да го промени регионот целосно, кон подобро.