Премиерот Димитар Ковачевски денеска имал телефонски разговор со неговиот бугарски колега Галаб Донев, во кој дал уверување дека случајот со претепаниот Охриѓанец, кој бил секретар на бугарскиот културен клуб „Цар Борис Трети” од Охрид, ќе добие разрешница, јави бТВ.

Според телевизијата, Донев го осудил „нападот врз Христијан Пендиков” и во разговорт со Ковачевски „го означил како целосно неприфатливо, опасно, криминално дело извршено врз државјанин на Република Северна Македонија со бугарска самосвест”.

Донев побарал од страна на локалните власти итно да бидат преземени сите неопходни мерки за заштита на Бугарите во земјава „од какви било инциденти предизвикани од омраза”.

Претходно, претепувањето на Пендиков го осуди и претседателот Стево Пендаровски.

– Го осудувам нападот врз секретарот на клубот на бугарската заедница во Охрид, Христијан Пендиков. Ги повикувам надлежните институции да спроведат брза и темелна истрага, со соодветна одговорност и санкции за сторителите, напиша Пендаровски на социјалните мрежи.

И делегацијата на Европската Унија (ЕУ) во земјава ги осудува сите акти на насилство како тој во Охрид и очекува властите да го истражат случајот.

– Ги осудуваме сите акти на насилство како што е овој. Очекуваме властите брзо да го истражат случајот и да ги изведат сторителите пред лицето на правдата, се вели во одговорот од Делегацијата на ЕУ, на прашање од МИА за коментар на синоќешниот инцидент во Охрид.