Новоназначениот координатор на огранокот на ДУИ во Чаир, Бујар Османи, вечерва на собир во скопската населба порача дека „за неколку месеци Македонија ќе го добие првиот премиер-Албанец“.

„Бевме народ без јазик, без знаме, без достоинство и горди на тоа што бевме, а да се вратиме таму каде што сме сега и да ја направиме разликата и да почнеме од горе – долу. Да почнеме со претседателот на државата, кој е консензуален и ја води војската со печат што е на албански јазик. Денеска имаме Собрание што во последните шест години го водат Албанци. Всушност, имаме три парламенти во регионот кои сега се водат на албански јазик. Ја имаме Владата во која за неколку месеци го чекаме првиот албански премиер“, рече Османи, додавајќи дека од 18 министри 9 се Албанци.

Оваа најава на Османи доаѓа во екот на судирот во ДУИ меѓу лидерот Али Ахмети и највисоките владини функционери од партијата, Артан Груби и Османи од една страна, наспроти пратеникот и поранешен чаирски градоначалник, досега неприкосновен во скопскиот бастион на ДУИ, Изет Меџити и неговата „огнена група“.

Во исто време, со оглед на „пржинскиот“ договор за техничка влада што им претходи на секои парламентарни избори, доколку Османи алудира на премиер-Албанец во 100-те дена од преодниот кабинет, ова е првата изјава на владин претставник во која се најавуваат избори оваа година. ВМРО-ДПМНЕ со месеци бара предвремени парламентарни избори, но досега од Владата беа изрични дека изборите ќе се одржат во редовниот термин во 2024 година.