Фото: Фејсбук

Османи вели дека тој сега не е човекот најблизок до Ахмети: „Еквидистанцата е поздрава за ДУИ“

Кандидатот за градоначалник на Чаир и потпретседател на ДУИ, Бујар Османи, во неодамнешно интервју за телевизијата „21“ беше прашан дали по заминувањето на Артан Груби, станал човекот кој е најблизок до претседателот на ДУИ, Али Ахмети.

Новинарот го потсети Османи дека Груби претходно беше тој што стоеше покрај Ахмети, грижејќи се за неговиот јавен имиџ и појавувајќи се покрај него во секоја активност.

Османи негираше таква улога за себе, велејќи дека „еквидистанцата“ на Али Ахмети со неговите соработници е поздрава за партијата.

„Не, не, всушност ми се допаѓа што сега има еквидистанца помеѓу г-дин Ахмети и луѓето околу него. Мислам дека е поздраво. Претседателот Ахмети комуницира со сите подеднакво, со секретарот, со потпретседателите, со другите. Ова ја отвори партијата и тоа ми се допаѓа. Никогаш не би сакал да бидам „најблизок“, дури и да ми се даде шанса, бидејќи тоа не е добро за партијата“, рече Османи.

Поранешниот вицепремиер Артан Груби на 11 декември лани беше ставен на „црната листа“ на САД поради сомневања за корупција. Според соопштението од Стејт департментот, Груби бил вмешан во обиди за заштита на поранешниот директор на Управата за безбедност и контраразузнавање (УБК), Сашо Мијалков од затворски казни, преку влијание во судски процеси. Оваа одлука за додавање на Груби на црната листа следеше по обвинувањата за корупција и злоупотреба на службената должност во земјава.

Неколку недели подоцна, Груби избега од државата преку граничниот премин „Блаце“ кон Косово со помош од полицајци, а оттогаш не се знае каде е тој.

Почитуван читателу,

Нашиот пристап до веб содржините е бесплатен, затоа што веруваме во еднаквост при информирањето, без оглед дали некој може да плати или не. Затоа, за да продолжиме со нашата работа, бараме поддршка од нашата заедница на читатели со финансиско поддржување на Слободен печат. Станете член на Слободен печат за да ги помогнете капацитетите кои ќе ни овозможат долгорочна и квалитетна испорака на информации и ЗАЕДНО да обезбедиме слободен и независен глас кој ќе биде СЕКОГАШ НА СТРАНАТА НА НАРОДОТ.

ПОДДРЖЕТЕ ГО СЛОБОДЕН ПЕЧАТ.
СО ПОЧЕТНА СУМА ОД 100 ДЕНАРИ

Видео на денот