Претседателката на Косово, Вјоса Османи, пред пратениците во Собранието посочи дека американскиот секретар Ентони Блинкен на средбата одржана во Вашингтон ја повторил поддршката и партнерството со Косово.

„Претседателот Џо Бајден повтори дека дава голема поддршка за Косово, велејќи дека никогаш нема да не остават сами. Повторената поддршка на САД деновиве докажува дека Косово нема поважен партнер од Соединетите Американски Држави, затоа мора да го третираме овој сојуз како свет и вечен да го чуваме и негуваме“, рече Османи.

Османи изјави дека северот на Косово е голем предизвик поради територијалните претензии на Србија. За време на нејзиниот годишен говор пред пратениците во Собранието, Османи повторно ја обвини Србија дека поддржува криминални групи на северот. Таа вети дека институциите се решени да ги обезбедат граѓаните на Косово кои живеат во овој дел на државата бидејќи, како што рече, на криминалните банди не им се допаѓа решителноста на институциите за владеење на правото.

„Северот на Косово продолжува да биде предизвик поради територијалните претензии што Србија ги има кон Косово кои ги изразува преку финансирање и поддршка на нелегални криминални структури. Но, ние сме решени како никогаш досега да создадеме безбедност и владеење на правото на секој агол на нашата територија. Ќе се соочат со правдата за кривични дела против уставниот поредок и за заплашување на граѓаните. Сите сме сведоци на постојаната закана на Србија за Косово. Оваа закана со димензии на агресија, неодамна се манифестираше преку хегемонистичката идеја за распоредување на српски воени трупи на Косово. Но, Србија и нејзиниот лидер многу добро знаат дека присуството на српската војска на територијата на Косово еднаш засекогаш заврши на 12 јуни 1999 година“, рече Османи.