По бројни предизвици на патот кон полноправно членство во Европската Унија и неверојатни 22 години од потпишувањето на Спогодбата за стабилизација и асоцијација, Република Северна Македонија минатата година направи историски исчекор и ги започна преговорите за пристапување во ЕУ, кои означуваат почеток на новата и квалитативно највисока фаза во односите со ЕУ пред полноправното членство. За остварување на оваа стратешка цел минатата година беше потребна политичка храброст и ние ја презедовме без двоумење во интерес на нашите сограѓани. Многумина дома се уште не се убедени дека ја донесовме вистинската одлука и наша заедничка цел треба да биде да ги увериме со дела дека проширувањето е живо и дека и нашите граѓани наскоро ќе имаат шанса да ја почуствуваат конкретната корист од трансформацијата која ни претстои.

Ова го истакна шефот на дипломатијата Бјар Османи во обраќањето пред членовите на Комисијата за надворешни работи на Европскиот парламент (АФЕТ) во Брисел.

Министерот Османи истакна дека државата е подготвена за постигнување консензус меѓу политичките партии за клучните области од реформите и европската агенда и за зајакнување на соработката со Комисијата за европски прашања и Националниот совет за евроинтеграции како форуми за водење на конструктивна дебата за ЕУ реформите и пристапните преговори

Тој потсети дека во меѓувреме земјата успешно го започна скрининг процесот на европското законодавство и нашите преговарачки тимови со исклучителна посветеност, знаење и професионализам успешно ги бранат досегашните придобивки од нашата макотрпна работа и нашите колеги се целосно подготвени и ангажирани да одговорат на сите обврски во однос на усогласувањето и спроведувањето на европското законодавство, што ќе биде значајно за натамошната динамика на процесот на преговори.

-Меѓутоа, она што е особено важно за нас во периодот кој доаѓа и за што вие самите имате значајно влијание е што е можно поскоро да го добиеме Скрининг извештајот за Кластерот 1 – Темели од Европската комисија и да започне конкретната работа врз подготовка на трите патокази, за владеењето на правото, реформата на јавната администрација, и функционирањето на демократските институции, како и на Акцискиот план за малцинства и заедници, кој го прифативме токму за да и покажеме дека Северна Македонија има многу што да и понуди на ЕУ, а не да скрие, рече Османи.

Тој со порака и „до бугарски пријатели дека обврските од Договорот и од двата протокола не се заборавени“.

-Лично ги надгледувам работните групи за реализација на взеамните обврски и наскоро ќе излеземе со резултати од нивната работа во делот на говорот на омраза, за рехабилитација на жртвите на репресиите на комунистичкиот период, за спроведување на усвоените препораки од работата на историската комисија, како и за заштита од дискриминација. Меѓутоа, истовремено бараме услови за водење на конструктивен и добронамерен дијалог базиран на меѓусебно уважување и почитување и од страна на Бугарија. Верувам дека набрзо со формирањето на новата Влада во Софија ќе успееме да го постигнеме тоа, порача Османи.

Тој укажа и на дилемите и стравовите на граѓаните во земјава дома, но и на неповторлива шанса која ни претстои конечно да отскокнеме и да ја зацврстиме нашата самодоверба и заедничка мисија.

-Таа во моментов поради демократски зовриената размена не се препознава добро, но набрзо ќе се соочиме, секој на свој начин, со сопствената одговорност. Напред кон Европа со повеќе интеграција долж патот до полноправно членство или назад повторно кон поделби и залудно изгубено време, вели Османи.

Новата комплексна геополитичка реалност, рече, ја зајакна потребата од зголемен фокус и анганжман на ЕУ во регионот на Западен Балкан со динамизирање на ЕУ пристапниот процес, што ќе придонесе за унапредување на демократскиот развој, стабилноста и просперитетот на опшествата и сите наши граѓани.

Гласањето на Нацрт-резолуцијата за Северна Македонија за 2022 година во Комисијата е предвидено за крајот на мај, додека усвојувањето на пленарна седница на Европскиот парламент се очекува кон средината на јуни 2023 година.