Кандидатот за градоначалник на Скопје од ВМРО-ДПМНЕ, Орце Ѓорѓиевски, во интервју за „Нова Македонија“ изјави дека негов приоритет е целосна обнова на јавниот превоз во главниот град.

– Јавниот превоз е крвотокот на секој модерен град и токму затоа сметам дека неговиот развој е клучен за Скопје. Мојата визија е да изградиме јавен транспорт кој ќе биде прв избор на скопјани, брз, достапен, удобен и пред сè, сигурен. Сакам луѓето да можат без двоумење да изберат автобус, знаејќи дека ќе стигнат на време, со квалитетна и безбедна услуга – посочи тој.

Првиот приоритет, според Ѓорѓиевски, е целосна обнова на возниот парк со нови, еколошки автобуси и воведување ред и дисциплина во работењето на ЈСП. Тој признава дека сегашната состојба е тешка – автобусите се стари, честопати се расипуваат, а линиите не ги покриваат сите делови од градот – но нагласува дека има јасен план и решеност да ја промени оваа слика.

Тој истакна дека сообраќајниот хаос ќе го решава преку изградба на нови булевари, мостови и кружни текови, како и со катни гаражи за ред во паркирањето.

— Особено ќе се вложи во изградба на нови кружни текови и мостови, меѓу кои и новороектираниот, кој ќе ги поврзува Ново Лисиче кај последна петка и општина Гази Баба и улицата Перо Наков, а ќе бидат ставени во функција и мостот во близина на салата на МЗТ Скопје кој го поврзува Булеварот АСНОМ во Општина Аеродром со булеварот Александар Македонски, како и мостот на Љубљанска во општина Карпош кој ги поврзува Карпош IV со локалитетот Скупи, како и со населените места Бардовци и Злокуќани.

Врвен приоритет ќе биде пуштањето во употреба на подземниот булевар Македонија, под Лимак, и изградбата на трите кружни текови на излезот и влезот на оваа клучна сообраќајница за главниот град — рече Ѓорѓиевски.

Кандидатот најави и мерки против загадувањето на воздухот – построг надзор врз индустриските загадувачи, субвенции за почисто затоплување и трансформација на депонијата Вардариште во голем парк.

— Планирам садење дрвореди покрај сообраќајниците, како и проширување на постоечките паркови. Зеленилото не само што го прочистува воздухот, туку создава и квалитетно живеалиште за граѓаните, простори за рекреација и одмор — додаде тој.

Во делот на урбанизмот, Ѓорѓиевски посочи дека ќе го следи моделот од Кисела Вода со меѓународни конкурси и со активно вклучување на граѓаните и експертите.

За пренаселеноста во главниот град, тој оцени дека решението е рамномерен развој на целата држава со капитални инвестиции во сите општини, со цел луѓето да имаат услови за живот и вработување и надвор од Скопје.