Унгарскиот премиер Виктор Орбан денес изјави дека сака левичарските групи Антифа во Унгарија да бидат прогласени за терористички организации.

„Крајно време е организации како Антифа во Унгарија да бидат прогласени за терористички, како што е случајот во Соединетите Американски Држави“, изјави Орбан за јавното радио, коментирајќи слична иницијатива на американскиот претседател Доналд Трамп.

Орбан ја поздрави одлуката на Трамп, додавајќи дека ќе предложи Будимпешта да го стори истото.

„Антифа е токму тоа, терористичка организација. Тие дојдоа во Унгарија, тепаа мирни луѓе на улиците, а некои беа претепани речиси до смрт. А потоа левичарските европратеници ѝ држат предавања на Унгарија за владеењето на правото. Тоа нема да помине“, заклучи Орбан.

Американскиот претседател претходно објави дека ќе ја означи претежно левичарската активистичка група Антифа како „голема терористичка организација“ и повика на истрага за нејзините наводни финансиери.

Тој додаде дека „исто така, силно ќе препорача оние што ја финансираат Антифа да бидат темелно истражени во согласност со највисоките законски стандарди и практики“.
Во текот на изминатата недела, Трамп и неговите сојузници се побунија против „радикалното левичарско политичко насилство“ по убиството на американскиот патриот Чарли Кирк.