Унгарскиот премиер Виктор Орбан останува на својот став дека ќе ја блокира кандидатурата на Украина за членство во Европската Унија, и покрај засилените дипломатски напори од Киев и европските партнери, пишува Блумберг.

Според извори запознаени со ситуацијата, Орбан во телефонски разговор со американскиот претседател Доналд Трамп го повторил своето противење, нагласувајќи дека „членството на Украина во ЕУ не нуди никакви безбедносни гаранции“. Истовремено, тој понудил Унгарија да биде домаќин на следната рунда мировни разговори меѓу украинскиот претседател Володимир Зеленски и рускиот лидер Владимир Путин.

Повикот следеше по состанокот на Трамп во Белата куќа со Зеленски и неколку европски лидери, кои побараа од Вашингтон да изврши притисок врз Орбан да го смени ставот. Сепак, унгарскиот премиер остана цврст во својата позиција, додавајќи дека „само Путин и Трамп можат да ја намалат опасноста од Трета светска војна“.

Орбан и натаму е постојан предизвик за ЕУ во однос на заедничката политика кон Москва, со чести блокади на европските санкции и помош за Украина. Иако неговата понуда Будимпешта да биде локација за мировни разговори сè уште не е прифатена, таа се разгледува во рамките на пошироките дипломатски напори за прекин на огнот.