Раководителот на Инспекторатот на Општина Тетово Седат Сулејмани коментирајќи го вчерашното обвинување на НП Шар Планина дека општината истура градежен шут на Шара загадувајќи ја природата, вели дека како локална самоуправа не бегаат од проблеми туку со истите се соочуваат. Обвинувањето Сулејмани смета дека е политички мотивирано, инспекторатот според него за фирмата која ја загадувала природата веќе презела мерки.

„Вчерашната негова реакција беше политички удар, а не реакција за проблемот што всушност се случи.Откако стигна до нас како општина реакција за проблемот, побаравме општинскиот инспекторат да го провери ова и веднаш да преземе мерки. По документирање на случајот, општинскиот инспекторат и наложи на фирмата која се занимава со реконструкција на патот, во најкраток можен рок да го отстрани сметот. И ова мора да се направи.Како општина не дозволивме ниту еден започнат проект да остане недовршен, бидејќи ова не наликува на сегашното раководство на општината. Ова е добро позната пракса на ДУИ, која ниту еден започнат проект не го доврши. Ви гарантираме дека нема да ги оставиме нашите проекти на половина“, рече градоначалникот на Општина Тетово Билал Касами.

Сулејмани упати неколку прашања до директорот на НП Шар Планина Ибрахим Дехари.

„Како Вие и Вашата партија дозволивте да се градат бројни хидроцентрали во овој парк за кој наводно толку се грижите?
А за оваа катастрофа да биде уште поголема, зошто овие хидроцентрали во 90% од случаите ги градат поранешни или сегашни функционери на Вашата партија?Господине Дехари, како дозволивте манипулација на Вашиот министер за екологија, кој ги измами граѓаните со тоа што наводно ја чистел депонијата на Попова Шапка, а всушност само ја маскирал? Или не сте го виделе ова за да снимате и правите сцени како вчера? Можеби пак, немате моќ да ги спречите затоа што Ви се сопартијци“? истакна Сулејмани.

Од Националниот парк Шар Планина, вчера на прес конференција приложија снимки на кои како што обвинија се гледа како градежниот шут собран при реконструкција на патот во викенд населбата Попова Шапка се фрла во близина на викендичките загадувајќи ја природата. Ова е скандалозна негрижа за природата што вчера ја демонстрираше општина Тетово при промена на асфалтот во населбата, истакнаа од установата.

ВИДЕО: Општина Тетово фрла градежен шут на Шара, обвинија од НП Шар Планина приложувајќи видео доказ